गडचांदूर :-
'हर घर तिरंगा,घर घर तिरंगा' या अभियानांतर्गत संपूर्ण भारतात 'आज़ादी का अमृत महोत्सव' मोठ्या उत्साहात साजरा होत आहे.भारताला स्वातंत्र्य मिळून 75 वर्ष होत आहे.मात्र आजही चंद्रपूर जिल्ह्यातील अतिदुर्गम क्षेत्र म्हणून ओळखल्या जाणाऱ्या कोरपना तालुक्यातील औद्योगिक शहर गडचांदूर येथील बंगाली कॅम्पवासी गेल्या अंदाजे 40 वर्षांपासून अक्षरशः निर्वासितांचे जीवन जगत आहे.वीज,रस्ते,नाली, घरकुल,अंगणवाडी अशा जीवनावश्यक व मुलभूत सुविधांपासून हे कुटुंब वंचित आहे.येथील माणिकगड सिमेंट कंपनी विकासामध्ये आडकाठी आणून मुलभूत सुविधांपासून वंचित ठेवत असल्याचे आरोप बंगाली कॅम्पवासीयांकडून होत आहे.हक्काचे जीवन जगता यावे यासाठी यांनी अनेकदा संबंधितांचे उंबरठे झिजवले.खाल पासून वरपर्यंत सर्वांपुढे व्यथा मांडली मात्र दरवेळी निराशाच पदरी पडली.मुलभूत सुविधा पुरविण्यात शासनप्रशासन सपशेल अपयशी ठरल्याची जळजळीत भावना येथील नागरिक करतात मात्र कोणालाही पााझर फुटत नसल्याची खंत व्यक्त होत आहे.'देशाला स्वातंत्र्य मिळाले आम्हाला कधी' ? असा प्रश्न आता बंगाली कॅम्पवासीयांनी थेट मुख्यमंत्र्यांना विचारला असून मदतीची याचना यांच्याकडे केली आहे.बंगाली कॅम्पच्या जागे विषयीचे प्रकरण न्ययायप्रविष्ट आहे हे मात्र विशेष.
-------//-------
'कोरपना LIVE'
मुख्यसंपादक
सै.मूम्ताज़ अली.
0 टिप्पण्या